Parat!

…fürs neue Jahr! Wir wünschen uns für uns alle ein Jahr mit weitem Horizont und unverkrampften Begegnungen, Raum für Träume und Träume, die wahr werden. Von diesen Wünschen handelt das Lied, welches in den letzten Tagen des alten Jahres entstanden ist: „Parat“.

Ds Meer isch wild, d’Geier zieh ihri Kreise,
dr Luft isch mild, vo Süde chunnter z’reise.
Nur i stah da, mi Radius isch chly,
möcht wytergah, am liebschte scho ganz gly,
i stah hie parat.

I stah ir Luft, bi am Schwäbe, wie ne Falk im Rüttelflug,
um mi dä Duft voll vo Läbe, iz chum ig ändlech zum Zug.
I sägle los, s’nimmt mi wunger, wo dr Wind mi häretreit,
d’Wält isch gross, i ha Hunger, gseh ke Wulche wyt u breit.

Vor mir ar Wand die alti, grossi Charte,
Land für Land isch dert uf üs am Warte.
Ä Fluss, ä See, ä Stadt, ä Bärg, es Meer,
i möcht se gseh, das wünschti mir so sehr,
i stah hie parat.

Lue dert, wyt uss, gsehsch dert das wysse Sägelboot,
u dert das Dorf, die Fänschter grüen u blau u rot,
lue dert die grosse Fälder, wyte Horizont,
gsehsch das?
Ghörsch dert die Gyge, d’Flöte u das Tambourin,
gsehsch, wie si tanze, Froue, Manne, gross u chlyn,
los mau die Stimme, Rüefe, Lache wyt id Nacht,
ghörsch das?

Musik und Text: Daniel Infanger
Bouzouki, Gitarre, Gesang: Daniel Infanger

.